സമ്പാദ്യക്കുടുക്കയിലെ മുഴുവന്‍ പണവും കനിവിലേക്ക് നല്‍കി മുഹമ്മദ് അമീന്‍
തിരൂരങ്ങാടി : വെളിമുക്ക് വി.ജെ.പള്ളി.എ.എം.യു.പി സ്കൂളില്‍ പന്ത്രണ്ട് വര്‍ഷമായി തുടരുന്ന ‘സഹപാഠിക്കൊരു സഹായം’ കനിവ് പദ്ധതിയിലേക്ക് തന്റെ സമ്പാദ്യക്കുടുക്കയിലെ മുഴുവന്‍ പണവും ഏല്‍പ്പിച്ച് ഒന്നാം ക്ലാസ്സ് വിദ്യാര്‍ത്ഥി മുഹമ്മദ് അമീന്‍ മാതൃകയായി. സാമ്പത്തിക പ്രയാസങ്ങള്‍ അനുഭവിക്കുന്ന സ്കൂളിലെ കുട്ടികളെ സഹായിക്കുക എന്നതാണ് കനിവ് പദ്ധതി ലക്ഷ്യമിടുന്നത്. കഴിഞ്ഞ പന്ത്രണ്ട് വര്‍ഷമായി വിദ്യാര്‍ത്ഥികളുടെയും രക്ഷിതാക്കളുടെയും അധ്യാപകരുടെയും സംയുക്ത സഹകരണം കൊണ്ട് മുന്നോട്ട് പോകുന്ന പദ്ധതിയുടെ ഭാഗമായി ഒരുപാട് കുട്ടികളെ ഇതിനോടകം സഹായിക്കാന്‍ കഴിഞ്ഞിട്ടുണ്ട്. വെളിമുക്ക് പാലക്കല്‍ പൈക്കാട്ട് വീട്ടില്‍ താമസിക്കുന്ന അസൈനാറിന്റെയും സുലൈഖയുടെയും മകനായ മുഹമ്മദ് അമീന്‍ സമ്പാദ്യക്കുടുക്കയില്‍ നിക്ഷേപമുണ്ടായിരുന്ന 500 രൂപയാണ് സഹപാഠികള്‍ക്കായുള്ള സഹകരണത്തിന് കനിവിലേക്ക് നല്‍കിയത്. 7 വയസ്സുള്ള അമീനിന്റെ ഈ പ്രവൃത്തി മറ്റുള്ളവര്‍ക്ക് മാതൃകയും അഭിനന്ദനാര്‍ഹവുമാണെന്ന് ഹെഡ്മാസ്റ്റര്‍ കെ.പി സിറാജുല്‍ മുനീര്‍ മാസ്റ്റര്‍ പറഞ്ഞു. കനിവ് കണ്‍വീനര്‍ വി.വി.എം റഷീദ്, ക്ലാസ് അധ്യാപിക സി.സാഫിറ എന്നിവര്‍ സമ്പാദ്യക്കുടുക്കയിലെ പണം ഏറ്റുവാങ്ങി.
ചിത്രം : വെളിമുക്ക് വി.ജെ.പള്ളി.എ.എം.യു.പി സ്കൂളിലെ ഒന്നാം ക്ലാസ് വിദ്യാര്‍ത്ഥി മുഹമ്മദ് അമീന്‍ സമ്പാദ്യക്കുടുക്കയിലെ മുഴുവന്‍ തുകയും സഹപാഠിക്കൊരു സഹായം പദ്ധതിയായ കനിവിലേക്ക് കൈമാറുന്നു.